Ydych chi'n meddwl am adael neu gymryd egwyl o'ch astudiaethau / eu gohirio?
Byddai'n syniad da i chi drafod materion o'r fath gyda'ch Tiwtor Personol ac yna gydag un o’r Cynghorwyr Myfyrwyr yn y Tîm Cefnogi Myfyrwyr. Gwnawn bob ymdrech i roi'r holl wybodaeth a'r cyngor angenrheidiol i chi i'ch helpu i wneud penderfyniad cytbwys. Bydd hynny'n cynnwys trafod goblygiadau eich penderfyniad a sut y bydd hyn yn effeithio ar eich ffioedd dysgu a llety, eich hawl i gael cyllid myfyrwyr, a’ch gallu i astudio yn y dyfodol. Gallai helpu datrys eich pryderon.
Os oes gennych chi fisa myfyriwr/haen 4 cysylltwch ag internationalsupport@bangor.ac.uk cyn gwneud hynny am arweiniad ar sut y gallai hyn effeithio ar eich fisa.
Nid yw’n anarferol i fyfyrwyr sydd wedi dod yn syth o’r Ysgol neu’r Coleg deimlo pwysau i fynd ar eu hunion i'r Brifysgol, a'u cael eu hunain yn y Brifysgol heb fod wedi rhoi llawer iawn o feddwl i bethau cyn dewis cwrs na Phrifysgol. Yn ôl rhai myfyrwyr, maen nhw'n teimlo fel pe baent ar ‘felin draed addysgol’, ac mai ychydig iawn o ddweud a fu ganddyn nhw ynglŷn â'u tynged. Os felly, efallai yr hoffech chi gymryd blwyddyn rydd o addysg, er mwyn cael amser i ystyried yr hyn yr hoffech chi ei wneud mewn gwirionedd.